Það er orðið tímabært að stofna alvöru kristilegan stjórnmálaflokk

Stjórnmálaflokkur sem byggði á kristnum gildum og siðferði er það sem við þurfum í dag.  Það hefur því miður sýnt sig að ekki er hægt að reiða sig á gömlu flokkana og ekki heldur þá nýju þar sem hver hugsar um eigin hag en ekki hag þjóðarinnar.  Óheiðarleiki, ósannsögli, baktjaldamakk og óheilindi er það sem hefur einkennt stjórnmálaflokkana.

Ég vil sjá breytingu og ef kristilegur stjórnmálaflokkur gæti leitt til breytinga þá vil ég fylkja mér bak við þann flokk, ég vil allavega láta reyna á það og ég er viss um að allmargir myndu vilja láta reyna á slíkan flokk og veita honum brautargengi.

 

Vilja stofna kristilegan stjórnmálaflokk

Nú taka þau að hverfa eitt af öðru

Vegna aðgerðar- og ráðaleysis stjórnvalda fækkar fyrirtækjum, þ.m.t. verslunum og þjónustufyrirtækjum einu af öðru og við það fjölgar þeim sem eru á atvinnuleysisskrá.

Ástæða þess að verslunum fækkar er sú staðreynd að dregið hefur úr neyslu.  Aðgerðir stjórnvalda leiða af sér að fólk sem á pening heldur að sér höndum og þeir sem ekki eiga pening geta ekki verslað.  Þetta kemur niður á verslun og þjónustu og endar með því að fyrirtæki verða að hætta rekstri og segja upp launþegum sínum.  Launþegarnir fara á atvinnuleysisbætur sem atvinnuleysistryggingasjóður borgar. 

Útgjöld atvinnuleysistryggingasjóðs hækka á sama tíma og tekjur sjóðsins minnka.   Tekjur ríkissjóðs og sveitarfélaga dragast saman þar sem fyrrnefnd fyrirtæki hætta að afla ríkissjóði tekna í formi óbeinna skatta og skatttekjur ríkis og sveitarfélaga er þau höfðu af launþegunum hverfa þar sem launþeginn hefur ekki neinar launatekjur lengur.

Þetta er staðreynd sem "Norræna velferðarstjórnin" virðist ekki skilja.  Ríkisstjórninni ætlar svo gersamlega að takast að klúðra málum svo algerlega að leitun er að öðru eins.  Jafnvel Mugabe í Zimbabwe fær hljómgrunn þar sem ríkisstjórn Íslands fær ekki hljómgrunn.

Við höfum ekki efni á "Norrænni velferðarstjórn" lengur, við þurfum nýja stjórn og nýtt þing.

 

Hættir eftir 17 ára starfsemi

Eru stjórnmálamenn tilbúnir að axla ábyrgð á því sem þeir eru að leiða yfir þjóðina ?

Stærsti hluti íslenskra fyrirtækja er tæknilega gjaldþrota.  Úrræði sem kallað hefur verið eftir af hálfu ríkisstjórnarinnar láta á sér standa.  Ráðherrar ríkisstjórnarinnar yppa öxlum, ranghvolfa í sér augunum, snúa sér í hringi og vita ekki hvað til bragðs skal taka.  Stjórnarandstaðan virðist að mestu jafn ráðþrota.

Eru stjórnmálamenn tilbúnir að axla ábyrgð á því sem þeir leiða yfir þjóðina með úrræða- og ráðaleysi sínu.  Ábyrgðin er mest hjá ríkisstjórninni, vegna þess að þeir sem þar sitja sem ráðherrar koma engu til leiðar, en vilja samt halda í völdin og koma þar með í veg fyrir að aðrir sem hugsanlega hafa úrræði til lausnar þeim vanda sem við er að glíma, geti komið að málum.

Stjórnarandstaðan lætur allt of lítið í sér heyra og virðist að mestu jafn úrræðalaus.  Fyrst ríkisstjórnin kemur ekki með nein úrræði á stjórnarandstaðan að koma fram með sínar hugmyndir og þrýsta á að farið verði í aðgerðir til að bjarga atvinnulífinu.  Ef atvinnulífið stöðvast, þá er voðinn vís, en það stefnir einmitt í að menn hreinlega gefist upp á að reka fyrirtæki við þessar aðstæður.  Hvar ætlar ríkisstjórnin þá að afla ríkissjóði tekna ? hjá atvinnuleysis-tryggingarsjóði ?

Við höfum ekki efni á að hafa þá ríkisstjórn sem nú er við völd.  Við höfum ekki efni á að hafa ráðalausa ráðherra.  Við höfum ekki efni á að hafa vanhæfa þingmenn á Alþingi.  Við höfum ekki efni á að láta atvinnulífið stöðvast.  Við höfum ekki efni á að gera ekkert fyrir heimilin í landinu.  Við höfum ekki efni á þessu ráðaleysi sem ríkir í Stjórnarráðinu.  Við höfum ekki efni á Samfylkingunni.  Við höfum ekki efni á Vinstri grænum.  Við höfum ekki efni á að ganga í ESB.  Við höfum ekki efni á að borga Icesave.  Við höfum ekki efni á að fara að ráðum AGS.  Við höfum ekki efni á þeim háu stýrivöxtum sem Seðlabankinn leggur á þjóðina.

Við höfum ekki efni á að fara ekki í greiðsluverkfall.  Greiðsluverkfall í hálfan mánuð hefur ekkert að segja.  Greiðsluverkfall sem boðað yrði í þrjá mánuði myndi kalla á aðgerðir strax.

Að lokum þetta: Við þurfum fólk í Stjórnarráðið sem veit, skilur, getur, kann og framkvæmir.  Fólk sem er fyrir Ísland og vegna Íslands, ekki fólk sem eru erindrekar Gordon Brown's eða ESB.

 

ÁFRAM ÍSLAND - EKKERT ESB

ÁFRAM ÍSLAND - BURT MEÐ ICESAVE

ÁFRAM ÍSLAND - BURG MEÐ AGS

Uppgjöf meðal atvinnurekenda

Ríkisstjórnina skortir vilja til að bjarga heimilunum

Ekki verður annað séð en ríkisstjórnina skorti vilja til að bjarga heimilunum og fyrirtækjunum í landinu.  Á meðan Framsóknarmenn koma með mótaðar tillögur um úrræði fyrir heimili í vanda snúast stjórnarliðar í hringi um sjálfa sig og vita ekki hvað snýr upp eða hvað snýr niður í þessum heimi.  Jafnvel maðurinn sem hélt þrumu ræðu á Austurvelli um aðgerðarleysi þáverandi ríkisstjórnar, er ráðvilltur og úrræðalaus í dag, þó svo hann hafi nú setið í stól ráðherra viðskipta- og efnahagsmála í nærri átta mánuði og ekki gert neitt.  Hagfræðingurinn í ríkisstjórninni virðist ekki skilja hagfræði heimilanna eða hvað til þarf til að reka fyrirtæki.

Það er dapurlegt að horfa upp á jafn úrræðalausa ríkisstjórn eins og við okkur blasir í dag, samt þykjast þau vera vinna á fullu og þau eru búin að vera að í tæpa átta mánuði, en enn bólar ekki á neinu að viti. 

Það eina sem kemur frá blessaðri ríkisstjórninni er að hneppa þjóðina í enn meiri fjötra.  Ráðherrar eru ekki fyrr búnir að kynna nýjar álögur á þjóðina er þeir boða enn frekari álögur, en að boða lausnir fyrir heimilin ? neeeei, það er ekki svo gott, því að ráðherrarnir eru uppteknir við að leysa mál bankanna og útrásarvíkinganna, þeir mega nefnilega ekki við því að tapa einum eyri. 

Almenningur þarf að sjá til þess að víkingarnir tapi ekki neinu, þeir þurfa nefnilega að reka dýrar eignir í útlöndum sem þeir hafa neyðst til að kaupa svo þeir geti verið í friði fyrir ágangi hins almenna Íslendings heima á Fróni, þeirra sem með ósvífni krefjast þess að þeir sæti ábyrgð á geðum sínum.  Ætli almenningur viti ekki að það sem víkingarnir voru að gera var allt í þeim tilgangi að Íslandi vegnaði vel og kæmist á heimskortið og til þess að forseti vor yrði þekktur um allan heim og að allstaðar yrði hann dáður og dýrkaður ?

Eiga Framsóknarmenn og aðrir Íslendingar ekki bara að vera þakklátir og ánægðir með aðgerðarleysi ríkisstjórnarinnar og vera ekki með neitt vesen, heldur beygja sig og bugta fyrir þeim sem af mikilli fórnfýsi taka að sér að verma ráðherrastólana, gera ekki neitt en þiggja laun sem almenningi býðst ekki ?

 

ÁFRAM ÍSLAND - EKKERT ESB

ÁFRAM ÍSLAND - BURT MEÐ ICESAVE

ÁFRAM ÍSLAND - BURT MEÐ AGS

Framsóknarmenn vilja að gripið verði til aðgerða strax

Lausn efnahagsmála eru skattahækkanir

Eina leiðin sem ríkisstjórn Jóhönnu Sigurðardóttur sér til að koma í veg fyrir algert efnahagshrun, sem myndi gera það að verkum að bankarnir færu endanlega á hausinn, krónan yrði verðlaus og gengi hennar ekki skráð og til að bjarga ríkissjóði frá endanlegur hruni, er að skattpína þjóðina svo að algert efnahagshrun blasir við, bankarnir fara endanlega á hausinn, krónan verður verðlaus og gengi hennar ekki skráð og ríkissjóður hrynur endanlega ásamt heimilunum og fyrirtækjunum í landinu.

Þetta kallast að slá skjaldborg um heimilin og fyrirtækin.  Þegar Jóhanna sagði fyrir kosningar að slá ætti skjaldborg um heimilin og fyrirtækin, misskildu allir það sem Jóhanna var að segja, hún var í raun að segja okkur það að það ætti að gera alla eignalausa.  Nú er ríkisstjórnin á góðri leið að takast það ætlunarverk sitt.  Almenningur hélt að það ætti að bjarga heimilum og fyrirtækjum, en það var bara tómur misskilningur.

Ríkisstjórnin vinnur að því hröðum skrefum að færa okkur aftur til níundu aldar, 874 eða þar um bil, þegar menn hjuggum mann og annan og þegar þrælahald var algengt og viðurkennt.

 

Miklar skattahækkanir í farvatninu

Ísland fyrir íslendinga

Fyrirvararnir sem samþykktir voru á Alþingi gengu allt of langt í að þóknast Bretum og Hollendingum, nú vilja þessar þjóðir meira og eru ekki sáttar við þá fyrirvara sem settir voru.  Nú er kominn tími til að segja hingað og ekki lengra og afturkalla ríkisábyrgðina, ábyrgðina sem aldrei átti að samþykkja. 

Jafnframt þarf að losa þjóðina við ríkisstjórnina sem hefur ekkert gert til að verja hagsmuni íslensku þjóðarinnar eða velferð almennings, við þurfum ekki á slíku fólki að halda eða stjórnmálaöfl sem svíkja og ljúga að þjóðinni eins og Samfylkingin og Vinstri grænir hafa stundað undanfarin misseri.  Ennfremur má segja að Sjálfstæðisflokkurinn hafi valdið vonbrigðum, sá flokkur stóð ekki í lappirnar í Icesave-málinu á Alþingi þegar kom að endanlegri afgreiðslu málsins, fyrir utan tvo þingmenn flokksins.

Það er kominn tími til að setja á stofn nýjan stjórnmálaflokk, flokk fólks sem hefur hagsmuni þjóðarinnar að leiðarljósi en hafnar sérréttindum útvalinna einstaklinga og fyrirtækja, fólk sem er heiðarlegt og sannsýnt í orði og verki, fólk sem lætur ekki hræða sig til að þóknast duttlungum og annarlegum sjónarmiðum sérhagsmunahópa.

Áfram Ísland ekkert ESB

Áfram Ísland ekkert Icesave

Nú er lag, nú þarf að breyta

Það er deginum ljósara að Bretar og Hollendingar eru ekki sáttir við fyrirvara þá sem Alþingi setti vegna ábyrgðar á Icesave-samkomulaginu.  Jóhanna og Steingrímur segjast vera sátt við athugasemdir þeirra, sem er þveröfugt við það sem aðrir segja. 

Nú þarf að skipta þeim, þ.e. Jóhönnu og Steingrími, út og fá nýtt fólk í brúna.  Við þurfum fólk við stjórnvölin sem vinnur fyrir íslensku þjóðina og ber hagsmuni þjóðarinnar fyrir brjósti, en ekki sérhagsmuni bankanna, útrásarvíkinganna, Evrópusambandsins eða pólitískra duttlunga stjórnmálaflokkanna.  Því miður eru þeir ekki margir á þingi sem hafa þann eiginleika, því þarf að leita út fyrir Alþingi eftir fólki sem tilbúið er að vinna fyrir Ísland og íslenska hagsmuni.

Ljóst er að nú þarf að fara að vinna að undirbúningi nýs stjórnmálaafls.  Þar þurfa að vera menn og konur sem eru laus við hagsmunatengsl út og suður, fólk sem hefur hæfileika og vilja til að sinna hagsmunum þjóðarinnar og láta ekki stundargróða villa sér sýn.

Þjóðin þarf á leiðtogum að halda, þeir leiðtogar eru ekki á Alþingi.  Það eru nokkrir aðilar utan þings sem að mínu mati kæmu til greina sem leiðtogar, menn sem hafa hæfileika til að stjórna og leiða okkur út úr þeim ógöngum sem síðustu ríkisstjórnir hafa komið okkur í.

Fyrsta skrefið er að koma þessari ríkisstjórn og forsetanum frá völdum, við getum ekki haft forseta sem stundar plott og hrossakaup bak við tjöldin með hinum stjórnmálamönnunum hvort sem er á vinstri eða hægri væng stjórnmálanna, eins og ORG gerði þegar núverandi ríkisstjórn var mynduð.

 

Icesave í utanríkismálanefnd

Eiga Guernsey búar sem áttu sparifé í Landsbankanum ekki sama rétt og aðrir innistæðueigendur ?

Það hljóta að vera sjálfsögð réttindi sparisjáreigenda Landsbankans á Guernsey að fá bætur eins og Bretar og Hollendingar.   Vill Steingrímur ekki bara senda Svavar Gests. í hvelli til Guernsey til að skrifa undir samning við þá ?  Hvað munar okkur um nokkur hundruð milljarða í viðbót ?  Breytir það orðið nokkuð hvort það taki okkur 100 eða 150 ár að komast út úr þessu klúðri.  Ég er viss um að ríkisstjórnin hefur fullan skilning á málinu.

ps. eru ekki fleiri sem við getur borgað fyrir ?

 

Hóta að höfða mál gegn íslenska ríkinu

Ef aðgerðir til bjargar heimilunum mega ekki kosta neitt, þá er aðeins tvennt til ráða.

Ef ekki má kosta neinu til til að koma heimilum og fyrirtækjum til bjargar og ríkisstjórninni alvara með að koma þeim til hjálpar, þá er aðeins tvennt til ráða svo að fólk fái horft á framtíðina með von í brjósti um betri tíð og blóm í haga.

Í fyrsta lagi, að frysta verðtrygginguna, eða öllu heldur afnema verðtryggingu lána og færa gjaldeyrislán á byrjunarreit og afnema gengistryggingu þeirra.

Í öðru lagi að lækka stýri- og útlánsvexti verulega.  Stýrivextir færðir niður í 2% og útlánsvextir niður í 4,5%.

Hvað afskriftum á lánum á yfirveðsettum fasteignum varðar, þá þarf að sjá til þess að áhvílandi lán eftir afskriftir séu ekki hærri en sem nemur 80 til 90% af virði eignarinnar, ekki, alls ekki 105 eða 110%, það kemur ekki til greina, vilji menn með sanni koma fólki til bjargar.

Ef stjórnvöldum er alvara með því sem þau segja, verða þau að gera eitthvað þessu líkt og það strax.

Dýrmætur tími hefur farið í súginn og miklum tíma eytt í mál sem koma þjóðinni illa.  Nú duga engin vettlingatök, hendur verða að standa fram úr ermum og ákvarðanatökur sem koma landi og þjóð að gagni verða að koma strax, vilji þeir sem verma ráðherrastólana komast skammlaust frá stjórnarsetunni.

Ofangreindar tillögur mínar mega stjórnarliðar taka og gera að sínum þeim að kostnaðarlausu.

Á sama tíma verð ég að lýsa vonbrigðum mínum með getu- og úrræðaleysi stjórnar-andstöðunnar.

 

Ætli Jóhanna og Össur viti af þessu ?

Er hugsanlegt að því hafi verið haldið leyndu fyrir Jóhönnu að þjóðin vill ekki í ESB ?  Ætlar Jóhanna að þröngva ESB ofan í kok þjóðarinnar ?  Gerir hún sér grein fyrir því hver eftirmæli hún fengi ef það gerðist ?

Ég er hræddur um að hún yrði stimplaður sem versti forsætisráðherra sem þjóðin hefur átt.  Skildi hún verða sátt við slík eftirmæli ?

Össuri er hinsvegar alveg sama, það er búið að lofa honum bitlingum í Brussel, stórri skrifstofu, stóru skrifborði úr eðalviði.  Það sem Össur hefur hinsvegar ekki áttað sig á enn er það að hann verður ekki í sviðsljósinu, hann verður bara óbreyttur starfsmaður á skrifstofu einhvers úr elítu Barrosos.

 

Fleiri andvígir en hlynntir ESB-aðild