Er Pútín einn um að vara við því sem í vændum er?

Það er einkar athyglisvert að það skuli vera Vladímir Pútín forseti Rússlands sem varar við erfiðum tímum.  Pútín í ræðu sinni á Rússneska þinginu varar landa sína við erfiðum tímum, en margir með réttu eða röngu vilja meina að hann eigi sök á þeirri stöðu sem Rússar eru í.  Það sem veldur mér hinsvegar áhyggjum er sú þögn vestrænna stjórnvalda þegar kemur að framtíð þeirra þjóða sem þau eru fulltrúar fyrir.

Loftbólan sem hefur haldið dollara, evru og fjármálamörkuðum gangandi frá síðasta hruni er að því komin að springa og enginn segir neitt, allir láta líta svo út að allt sé í stakasta lagi, en það er það því miður ekki. 

Næsta hrun, sem að öllum líkindum verður næsta haust, ef ekki fyrr, verður mun alvarlegra en hrunið 2008.  Hrunið sem varð 2008 og afleiðingar þess mun verða barnaleikur í samanburði við það sem í vændum er.

Skuldir Bandaríska ríkisins er talið vera meira en 17,5 trilljónir dollara, skrifast: 17.500.000.000.000, sem þýðir að skuld alríkisins á hvert mannsbarn nemi um 54.000 USD eða um 6.700.000 ISK.  Þá eru ótaldar almennar skuldir heimilanna sem taldar eru vera rúmar 16 trilljónir dollara og húsnæðislánin sem eru talin vera um 13,5 trilljónir, auk þess eru krítarkorta skuldir yfir 800 milljarða.

Hjá þjóð þar sem um 60% íbúa er á vinnumarkaði, þar af stór hluti, nokkrir tugir prósenta, í hlutastarfi, þá er ógerningur fyrir þá að standa undir þessum skuldum.  Á sama tíma heldur ríkisstjórnin áfram að taka lán á kostnað íbúanna og leggja óbærar kvaðir á komandi kynslóðir.

Í Brussel er gífurlegur blekkingarleikur í gangi, þar sem þeir er hafa ofurlaun og borga litla ef nokkra skatta, láta líta svo út sem allt sé í stakasta lagi.  Á meðan hafa þolþröskuldar heimila víða í Evrópu verið yfirstignir og má með undrun hrósa almenningi fyrir þá þolinmæði sem þeir hafa sýnt stjórnvöldum.  En í Grikklandi og á Spáni er skráð atvinnuleysi vel yfir 25% og vel yfir 50% meðal ungs fólks.  Frakkland sem hefur verið með öflugustu þjóðum á meginlandinu er nú á hraðri niðurleið.

Verðbréfamarkaðirnir hafa stigið hratt undanfarna mánuði, að frátöldum nokkrum smá bakslögum, eru á sömu leið og þeir voru í aðdraganda hrunsins 2008.  Þeir eru ótrúlega fáir sem sjá rauðu ljósin blikka og eru að reyna að aðvara fólk.

Við Íslendingar erum í betri stöðu en flestar nágrannaþjóðir okkar, en við munum ekki fara varhluta af komandi heimskreppu.

Ég bið góðan Guð að hjálpa okkur þegar það gerist, því manna hjálp og manna úrlausnir verða víðs fjarri.  Eina leið mannsins verður Drottin, trúin og samfélag okkar við Hann.

 

Pútín varar við erfiðum tímum