Þeir verst settu þurfa á sértækum aðgerðum að halda til viðbótar almennri leiðréttingu skulda.

Það er lífsnauðsynlegt fyrir fjármálakerfi þjóðarinnar að farið verði í almennar niðurfærslur (leiðréttingu) skulda.  Þar til viðbótar þurfa að koma sértækar aðgerðir til að koma þeim verst settu til aðstoðar.

Að halda því fram að bankarnir, lífeyrissjóðirnir og íbúðalánasjóður geti ekki tekið á sig þessar leiðréttingar, eins og margir hafa haldið fram, gengur ekki upp.  Ef þessar fjármálastofnanir koma ekki að málum af ótta við að tapa fé, þá má upplýsa það hér og nú að þær munu tapa mun meira fé en sá kostnaður yrði við að leiðrétta lánin.  Ekki munu fjármálafyrirtækin ein tapa á aðgerðarleysinu, heldur þjóðarbúið allt, því að aðgerðarleysið mun verða mun dýrara en þær leiðréttingar sem almenningur er nú að fara fram á.  Hér er einvörðungu verið að tala um leiðréttingar, það er að færa til baka þær tekjur sem fjármálafyrirtækin hafa reiknað sér í formi verðtryggingar, tekjur sem eru eingöngu á pappírum en engir raunverulegir fjármunir eru á bak við, fyrr en skuldarinn (hinn almenni Jón) hefur greitt þessar útreiknuðu tekjur fyrirtækjanna.

Ef farið verður út í almennar leiðréttingar lána, mun myndast svigrúm hjá fjölskyldum landsins sem mun nýtast við að koma hreyfingu á fjármálalíf landans.  Ef hins vegar haldið verður áfram að þrengja að heimilunum mun það aðeins hægja enn frekar á flæði fjármagns sem að lokum mun valda algerri greiðslustöðvun og þá verður allt stopp.  Engir munu geta greitt af lánum sínum, engin fyrirtæki munu geta greitt út laun, ríkissjóður fær engar tekjur, lífeyrissjóðir fá enga peninga til að braska með, bankarnir fara á hausinn og fólkið í landinu mun svelta.

Er þetta það Ísland sem við viljum sjá???

 

Flatur niðurskurður hjálpar ekki þeim verst stöddu