Svíar taka djarfar ákvarðanir í efnahagsmálum

Sænsk stjórnvöld hafa tekið djarfar ákvarðanir til að efla atvinnulífið í Svíþjóð.  Tímabundið verður kostnaður við viðhald á húsnæði frádráttarbær frá skatti.  Eins ætlar Sænski Handelsbankinn að veita viðskiptavinum sínum vaxtalaus lán til eins árs, eftir það geta viðskiptavinir annaðhvort greitt upp lánin eða breytt þeim á þann veg að þau beri markaðsvexti.  Fólk getur þannig fengið lán upp á 100 þúsund sænskar krónur, eða sem svarar til um 1,6 milljónir íslenskra króna.

Þarna er norræn velferðarstjórn í verki.

 

Svíum bjóðast vaxtalaus lán

Athugasemdir

[Guðmundur Ásgeirsson, 12.5.2009 kl. 17:52]

Vaxtalaus? Ekki alveg en næstum því, ef við berum það saman við við íslenskar aðstæður. Í Svíþjóð er nefninlega gengin í garð verðhjöðnun, en vísitala neysluverðs lækkaði þar um 0,1% milli apríl og maí. Það þýðir að lán sem ber nafnvexti 0% er með 0,1% raunvexti þar sem Svíar búa ekki við verðtryggingu lána. Því er spáð að verðlag í Svíþjóð muni hjaðna meira síðar á árinu eða allt að 1,4% sem myndi hafa í för með sér samsvarandi hækkun raunvaxta á þessum "nafnvaxtalausu" sænsku lánum.

Þess má geta að verðlag á Íslandi stendur nánast í stað og lækkaði meira að segja um þarsíðustu mánaðamót, en íslenska Hagstofan mælir m.a. húsnæðisverð sem fer hríðlækkandi og á enn eftir að skila sér af fullum þunga inn í vísitöluna á næstu mánuðum. Ef fram heldur sem horfir mun það ásamt lækkandi stýrivöxtum hafa í för með sér talsverða lækkun á afborgunum verðtryggðra lána, ásamt lækkun höfuðstóls vegna verðtryggingarinnar. Þess vegna væri glapræði að afnema verðtrygginguna á þessum tímapunkti því það myndi eingöngu þjóna hagsmunum fjármagnseigenda sem hafa nú þegar fengið ríkisstyrk upp á 200 milljarða inn í peningamarkaðssjóði. Útfrá hagsmunum skuldara ætti hinsvegar alls ekki að hrófla við verðtryggingunni fyrr en eftir að hún hefur gengið til baka eða verið leiðrétt vegna óeðlilegra áhrifa bankahrunsins. Látum ekki tölurnar plata okkur, þetta er allt saman afstætt!

[Tómas Ibsen Halldórsson, 13.5.2009 kl. 01:06]

Sæll Guðmundur, þetta er rétt hjá þér, en raunvextir í Svíaveldi er samt brot af raunvöxtum hér. 

Ég skrifaði um það á blogginu mínu í vetur að ekki væri rétt að afnema verðtrygginguna núna þegar séð er fram á vísitölulækkun, því að lántakendur eiga það inni að sjá lánin lækka í takt við lækkun verðtryggingarinnar og er ég þér hjartanlega sammála hvað það varðar.  Ég óttast hinsvegar að með verulegri hækkun á eldsneyti munum við ekki sjá þá lækkun sem annars ætti að verða á næstunni.  Við eigum hinsvegar að stefna að afnámi verðtryggingar við fyrsta tækifæri, eftir að jafnvægi kemst á verðbólguna, hvenær sem það kann að verða.