Víkingar - útrásavíkingar

Ef við lítum aftur í tímann og hugsum okkur Víkinga gera strandhögg á fjarlægum slóðum.  Hvað sjáum við fyrir okkur?  Ég sé fyrir mér grimma menn farandi um rænandi, ruplandi, nauðgandi konum og börnum og höggvandi mann og annan.

Hver er munurinn á víkingum og útrásavíkingum?  Í mínum huga er hann mjög lítill.  Útrásavíkingarnir hafa farið um rænandi og ruplandi á "löglegan" hátt en mjög svo siðlausan.  Víkingar fyrri tíma voru hetjur í augum sumra, útrásavíkingar voru líka hetjur í augum sumra og þó einkum í eigin augum og nokkurra frammámanna sem nutu þess að vera í sviðsljósinu.  Ég veit ekki til þess að útrásavíkingarnir hafi farið um nauðgandi konum og börnum, en þeir hafa höggvið mann og annan þ.e. þeir hafa af græðgi sinni ekki eirt neinum.  Ef þeir gátu haft pening út úr nokkrum þá var það gert án þess að taka tillit til þess sem blæddi.  Þannig hafa margir misst mikið jafnvel aleiguna í þeim eina tilgangi að svala græðgiþorsta útrásavíkinganna, en slíkir menn verða aldrei mettir.

Útrásavíkingarnir eru menn sem virðast vera samviskulausir.  Þeir sjá ekki að þeir hafa gert fólki og fyrirtækjum rangt til, siðblinda þeirra er algjör.  Þeim finnst í raun og veru að ófarir þeirra sé öðrum að kenna, en sjá ekki að þeir komu sjálfum sér í þessa stöðu þ.e. að missa fyrirtækin úr höndum sér.  Samt lítur út fyrir að þeir hafi komið miklum fjármunum í skattaskjól í fjarlægum löndum/eyjum.  Þetta eru fjármunir sem ættu að vera hér heima og hjálpa til við að bjarga því sem bjargað verður.  Gæti jafnvel farið langt með að greiða þau lán sem ríkið þarf nú að taka til að greiða fyrir óráðsíu útrásavíkinganna.

Þannig að í mínum huga er enginn munur á víkingum til forna og útrásavíkingum nútímans, þeir skilja allt eftir í rúst.