Símnotkun við bifreiðaakstur, er það heppileg iðja?

Á leið minni heim úr vinnu, á þeim tíma sem mikil umferð er, tek ég oft eftir því að fólk er að tala í síma undir stýri.  Ég sé oft á aksturslagi hvort ökumaður er að tala í síma eða ekki.  Þessi iðja er stór varasöm.  Einbeiting fólks er ekki sem skildi þegar það er að tala í síma á sama tíma og það ekur bifreið, gildir þá einu hvort um kvenmann eða karlmann er að ræða.

Sjálfur hef ég talað í síma undir stýri og verð ég að viðurkenna að einbeitingin að akstrinum er ekki sem skildi.

Símnotendur undir stýri valda oft truflun annarra ökumanna, því hef ég oftsinnis tekið eftir.  Bílar með slíka ökumenn undir stýri rása gjarnan  á veginum og ósjaldan teppa þeir aðra umferð þar sem þeir aka oft hægt á vinstri akrein, þar sem akreinar eru tvær eða fleiri, og halda öðrum ökutækjum fyrir aftan sig, sem síðan veldur óþarfa framúrakstri þar sem bílar fara sikk sakk á leið sinni um veginn.

Það eru til viðurlög í lögum við símnotkun undir stýri.  Það væri kannski rétt að nota þessi viðurlög og til athugunar ætti að vera hvort þeir sem eru að senda smáskilaboð (sms) undir stýri ættu að missa bílprófið.  Ég held að þeir sem stunda þá iðju geri sér ekki grein fyrir þeirri hættu sem þeir skapa með iðju sinni.

Það væri til góðs ef umræða um þessa iðju yrði almenn og fólk liti þetta alvarlegum augum.

 

90% telja símanotkun við akstur hættulega