Ætlar íslenska þjóðin láta Samfylkinguna hafa sig að fífli?

Ég hlustaði á utanríkisráðherra í Kastljósi í gærkveldi.  Þar talar hann um kröfur sem íslenska samninganefndin setti fram í viðræðum við ESB.  Ekki nefndi hann hverjar þær kröfur væru eða hvað í þeim fælust.  Ráðherrann sagði einnig að búið væri að semja um 11 kafla, þeir semsagt frágengnir.  Ég velti því fyrir mér hvaða kröfur íslenska samninganefndin hafi sett fram í samningum þeirra kafla og hvað ESB hafi verið tilbúið að semja við okkur Íslendinga um, á hvaða sviði gaf ESB eftir og hvað fengum við út úr þessum köflum?  Hvernig væri að leyfa okkur almenningi að kíkja í þennan margumtalaða pakka og sjá hvað nú þegar hefur komið þar í ljós?  Hvað hefur Össur séð í pakkanum sem hann er svo afskaplega hrifinn af að hann er tilbúinn að afsala þjóðinni fullveldisrétti til búrókrata í Brussel?  Af hverju er svona mikil leynd yfir því sem verið er að semja um? ef þá verið er að semja um nokkuð yfir höfuð.

Össur staðhæfði að næsta ríkisstjórn, hver svo sem hún yrði, myndi ekki slíta "samningarviðræðunum" við ESB því það myndi kosta okkur svo mikinn álitshnekki.  Ef við yrðum fyrir miklum álitshnekki við það að slíta viðræðum við ESB um innlimun okkar inn í það apparat, þá er sá álitshnekkur alfarið á kostnað Samfylkingarinnar númer eitt og Vinstri grænna sem hafa látið hafa sig að fífli Fylkingarinnar, Samfylkingin hefur aldrei þorað að spyrja þjóðina álits á því hvort sækja ætti um aðild að ESB.  Við göngum ekki bara inn í ESB vegna þess að við myndum skammast okkar fyrir að eyða öllum þeim tíma og fjármunum sem það hefur kostað okkur að uppfylla draumóra Samfylkingarinnar.  Þjóðin vill ekki inn í ESB sama hvað Jóhanna, Össur, Árni Páll eða hvaða krati sem er segja.  Íslendingar láta ekki hafa sig að fífli.

 

48,5% vilja ljúka viðræðum við ESB

Athugasemdir

[Ásthildur Cesil Þórðardóttir, 18.1.2013 kl. 10:43]

Tek undir það með þér Tómas að ég vil sjá þann árangur sem náðst hefur í þessum 11 köflum.  Og einnig að ef einhver skömm er að því að hætta við umsóknina, er það einvörðungu á kostnað Samfylkingarinnar og VG.

[Sigurður M Grétarsson, 18.1.2013 kl. 22:25]

Það er stór munur á því að klára aðildarsamning og það að ganga í ESB. Þegar búið er að klára aðildarsamningin þá verður kosið um það í þjóðaratkvæðagreiðslu hvort við viljum samþykkja þann samning og ganga í ESB. Ef þjóðinni líst ekki á samninginn þá einfaldlega hafnar hún honum í þjóðaratkvæðagreiðslu og við göngum ekki í ESB. Það sem Össur talar hér um varðandi álitshnekk er að klára ekki samningaviðræðurnar svo þjóðin geti tekið upplýsta ákvörðun um það hvort hún vilji ganga í ESB eða ekki.

Ástæða þess að ESB andstæðingar vilja ekki að þetta ferli sé klárað er sú að þeir vita að ef þjóðin fær allar upplýsignar þá mun hún átta sig á öllum lygunum, rangfærslunum, mýtunum og innistæðulausa hræðsluáróðrinum sem þeir hafa ausið yfir þjóðina. Þeir vilja kjósa meðan stór hluti þjóðarinnar trúir enn bullinu í þeim og er þar af leiðandi líkleg til að hafna aðild vegna ranghugmynda um það hvað af ESB aðild leiðir. Fólk gæti jafnvel trúað því að við missum fullveldi okkar við að ganga í ESB þrátt fyrir þá staðreynd að ESB er ekki ríki heldur samstarfsvettvangur 27 sjálfstæðra og fullvalda lýðræðisríkja í Evrópu sem hefur bætt lífskjör í öllum aðildarríkjum sínum og tryggt frið milli þeirra sem svo sannarlega var ekki tilfellið fyrir stofnun þess. Þessi ríki geta hvenær sem er ákveðið að hætta að taka þátt í þessum samstarfsvettvangi og því er tal um "innlimun í ESb" hlægilegt rugl sem segir  margt um þá sem láta svo slíkt bull frá sér fara.

Nei álitshnekkurinn er svo sannarlega ekki þeirra sem vilja eiga heiðarleg samskipti við nágrannaþjóðir sínar og klára ferli sem þeir sóttust eftir að eiga í samskiptum við þær og fá síðan niðurstjöðu eftir að allar staðreyndir eru á borðinu. Það eru þeir sem vilja laupa út undan sér og hætta ferlinu í miðjum klíðum af því að þeir eru hræddir við að sannleikurinn komi í ljós verði ferlið klárað.

[Tómas Ibsen Halldórsson, 18.1.2013 kl. 23:52]

Það er nú meira bullið sem kemur upp úr aðildarsinnum.  Kæri Sigurður, ef búið er að "semja" um ellefu kafla, hví má þá ekki leggja þá fyrir almenning svo þeir geti byrjað að kynna sér herlegheitin?  Eitt af loforðum Samfylkingarinnar var að allt ætti að vera uppi á borðum og því lofað að ekki yrði pukrast með hlutina.  Ekkert af þessu hefur staðist, auk þess hefur mjög lítið af fyrirheitum stjórnarflokkanna staðist, eigum við þá að leggja trú okkar og traust á þetta fólk núna þegar það er tilbúið að lofa öllu fögru svona rétt fyrir kosningar?

Af hverju tala stjórnarsinnar ekki um hlutina eins og þeir eru, að við erum ekki að semja um eitt eða neitt heldur erum við í fullu aðlögunar ferli? 

Sigurður, þú talar um 27 sjálfstæða og fullvalda lýðræðisríki í Evrópu þar sem lífskjör hafa batnað vegna þess að þau eru í ESB.  Þú fylgist greinilega ekki með, þú sérð ekki hvað er að gerast í gjörvallri Evrópu þ.e. þeim löndum sem eru í ESB.  Það er helst Þýskaland sem hefur notið góðs af þessu samstarfi, en flest hinna ekki.  Mikill undirróður er í flestum þessara lands, s.s. á Bretlandi, þar sem menn vilja slíta þessu samstarfi, en hótanir Brussel klíkunnar eru til þess gerðar að hræða fólk.

Svo skil ég ekki af hverju við þurfum að klára eitthvað sem við viljum ekki og við höfum ekki einu sinni verið spurð út í.  Þráhyggja Samfylkingarinnar fyrir ESB er mér óskiljanleg og ég veit um marga aðra sem eiga erfitt með að botna upp eða niður í þeim "stjórnmálaflokki" sem hefur bara eitt á stefnuskrá sinni.