Hún er skrítin tík, þessi pólitík !!!

Það er ekki að furða að virðing Alþingis setji niður, þegar við höfum flokka á þingi eins og þá sem þar eru í dag, með fólk sem hagar sér eins og það sé í sandkassaleik, gildir þá einu hvaða flokk þingmenn tilheyra.

Það er kominn tími til að skipta öllu liðinu út og fá heiðarlegt fólk, fólk sem er sanngjarnt, stundar sannleika og er heilsteypt.  Við þurfum fólk sem hugsar um hag þjóðarinnar umfram sinn eigin hag eða hag þess stjórnmálaflokks sem það tilheyrir.  Við þurfum fólk sem er ekki í hagsmunapoti fyrir einn hóp umfram þjóðarheildina.  Við þurfum fólk sem þorir að taka á málum og þorir að leiðrétta alla þá vitleysu sem lögð hefur verið á þjóðina með allskonar ólögum sem gerir ekkert annað en að hygla einum hóp manna umfram aðra, en allir flokkar eru brennimerktir af slíkum óheilindum.

Við þurfum ekki Ögmund eða Ólínu, Steingrím eða Jóhönnu og svona mætti lengi telja, við þurfum hinsvegar nýtt fólk með nýjar áherslur og nýja sýn.  Við þurfum fólk sem lætur orð og efndir fara saman.  Við þurfum ekki orðaflaum eða orðagjálfur, við þurfum að heyra það sem byggir upp, gefur von og verk sem fylgja þeim orðum og staðfesta það sem sagt er.

Ég kæri mig ekki um fólk á Alþingi sem er þar til að blása sjálft sig upp, til að vera séð af öðrum og gerir mikið úr sjálfu sér.  Við þurfum fyrst og fremst heiðarlegt fólk, fólk sem er fullt auðmýktar, laust við hroka og eigingirni, en er til staðar fyrir þjóðina og til að verja hagsmuni hennar og hefur reisn einstaklingsins í huga í þeim tilgangi að hver og einn fái að njóta sín.

Ekkert af þessu sé ég í fari þeirra sem stjórna landinu í dag, hvort sem það eru þeir sem eru í ríkisstjórn eða eru "bara" Alþingismenn.

Ég vil sjá nýtt Ísland leitt áfram af nýju fólki, sem blæs landi og þjóð von í brjóst.  Við þurfum að fara að líta upp og fram á við.  Við þurfum að líta til Hans sem gaf okkur þetta land, til Hans sem gefur okkur líf.

Við þurfum að líta til Guð vors lands og lands vors Guðs, Hann einn er fær um að gefa okkur bjarta framtíð.

 

Orð látin vaða eins og púðurskot

Athugasemdir

[Ásthildur Cesil Þórðardóttir, 1.2.2011 kl. 12:45]

ÉG held að vel flestir íslendingar séu búnir að fá nóg af þessum sandkassaleik stjórnmálamanna.  Málið er að þetta er líka heilmikið okkur að kenna, niðurstaða í  löngu ferli kæruleysis og áhugaleysis okkar kjósenda um að krefja alþingismenn um að efna loforð sem þeir gefa kjósendum sínum fyrir kosningar.  Við höfum sjálf valið þetta fólk til setur á þingi. 

Fyrst verðum við að breyta okkar  eigin hugsunarhætti og  fara að koma okkur saman um hvernig ÍSLAND við viljum hafa. Hætta að kjosa sömu hrunflokkana aftur og aftur, fyrst þegar við höfum tekið til í eigin hugarfylgsni er von til þess að við náum að hreynsa út subbuskapinn og velja fólk sem getur tekist við þau verkefni sem  þarf svo nauðsynlega að vinna.

[Ásthildur Cesil Þórðardóttir, 1.2.2011 kl. 12:47]

Hreinsa meinti ég.