Tugir milljarðar á kostnað þeirra sem minnst mega sín

Það má öllum vera ljóst að ríkisstjórnin með þau Steingrím og Jóhönnu í fararbroddi hafa lagt allt kapp á að fá að greiða Bretum og Hollendingum skuldbindingar óreiðumanna, á kostnað þeirra sem minnst mega sín í þjóðfélaginu.

Til að mæta þessum greiðslum þarf að draga verulega úr heilbrigðiskerfinu, lækka greiðslur til öryrkja og ellilífeyrisþega, svívirða atvinnulausa og lágtekjufólk með því að láta það þurfa að standa í biðröðum úti í kulda og trekk bíðandi eftir ölmusu úr höndum velgerðarfólks, en sjálf réttir ríkisstjórnin ekki fram litla putta til að búa í haginn fyrir þetta fólk.

Nei, þeir sem hrópuðu RANGLÆTI fremja nú hið sama sem þeir álösuðu öðrum fyrir, þar til þeir fengu að setjast í ilhlýja ráðherrastólana.

Ef einhverja hefði átt að draga fyrir landsdóm fyrir það að sinna ekki skildum sínum og það gagnvart þeim sem það er ráðið í vinnu fyrir, þá er það sú ríkisstjórn sem nú situr að völdum.

Við þurfum að fá nýja ríkisstjórn og nýtt fólk á Alþingi Íslendinga, við þurfum fólk sem þorir að standa með þjóð sinni, gegn yfirgangi nýlenduþjóða, gegn ESB og gegn AGS.  Þessar stofnanir leggja nú allt kapp á að fjötra, ekki aðeins okkur íslendinga, heldur Grikki, Íra, Portúgali, Spán og fleiri ríki í fjötra fátæktar, til þess að hygla þeim sem "auðæfum" stjórna.  En minnumst þess að "auður" þeirra mun ryðga og fúna, hann mun brenna upp í höndum þeirra og að engu verða, því að réttlætið mun ganga sigri hrósandi fram á völlinn og hrifsa af þeim völdin.

Í Jakobsbréfi í Biblíunni stendur eftirfarandi ritað í 5.kaflanum vers 1-6:  ¹Hlustið á, þér auðmenn, grátið og kveinið yfir þeim bágindum, sem yfir yður munu koma. ²Auður yðar er orðinn fúinn og klæði yðar eru orðin möletin, ³gull yðar og silfur er orðið ryðbrunnið og ryðið á því mun verða yður til vitnis og eta hold yðar eins og eldur. Þér hafið fjársjóðum safnað á síðustu dögunum. ⁴Launin hrópa, þau sem þér hafið haft af verkamönnunum, sem slógu lönd yðar, og köll kornskurðarmannanna eru komin til eyrna Drottins hersveitanna. ⁵Þér hafið lifað í sællífi á jörðinni og í óhófi. Þér hafið alið hjörtu yðar á slátrunardegi. ⁶Þér hafið sakfellt og drepið hinn réttláta. Hann veitir yður ekki viðnám.

Þessi orð eiga vel við í dag, þau eru geymd en ekki gleymd.

 

„Ég ber ábyrgð á Svavarsnefndinni“