Af hverju er logn á fasteignamarkaði???

Á mbl.is er frétt með fyrirsögninni "Enn logn á fasteignamarkaði" og nokkrar staðreyndir dregnar upp.

Hver skyldi vera ástæða þess að logn er á fasteignamarkaði???

Fyrir hrun var fasteignabóla sem stækkaði í sífellu.  Bankarnir, fasteignasalar, þeir sem voru að selja og kaupa virtust gersamlega missa sig.  Seljendur vildu fá sífellt meira fyrir eignir sínar, sem er að mörgu leiti skiljanlegt, og kaupendur kepptust um eignir sem voru á sölu og buðu sífellt hærra verð fyrir fasteignirnar og fasteignasalar kættust og öttu mönnum saman í yfirboðum.  Bankarnir voru stútfullir af peningum sem þeir þurftu að koma í verð og allir virtust vera að græða á öllu saman. 

Það kom að því að bólan sprakk og virtist koma öllum á óvart, það er eins og menn hafi haldið að þetta ástand sem var ætti að geta haldið áfram endalaust.

Nú hafa lánastofnanir leyst til sín fjöld eigna sem þeir vilja selja á yfirsprengdu verði, en fáir sem geta eða hafa áhuga á að bjóða í eignir þeirra. 

Vandi markaðarins eru lánastofnanirnar sem ekki vilja kvika frá uppsettum verðum.  Frekar vilja þessar stofnanir greiða fasteignagjöld, hitunarkostnað, viðhald og annað tilfallandi sem óhjákvæmilega verður þegar íbúðir standa tómar mánuðum saman.  Á sama tíma eru lánastofnanirnar ekki að fá neinar tekjur vegna þessara eigna.

Það sem þyrfti að gerast er að færa fasteignaverð niður um 20-30%, þá myndi skriða komast á markaðinn, fólk sjá sér far um að eiga í fasteignaviðskiptum.  Á sama tíma þyrftu lánastofnanir að leiðrétta lán þeirra sem eru með yfirveðsettar eignir og færa slík lán niður um 30-40%.

Ég geri mér grein fyrir því að margir munu telja mig ruglaðan að bera slíkt á borð, en málið er að stjórnvöld veigruðu sig við að koma á skjaldborg fyrir heimilin í landinu og í stað þess að taka á vanda þeirra strax, eins og sumir lögðu til, þá hafa stjórnvöld látið reka á reiðanum og afleiðingin er og verður meiri erfiðleikar á fasteignamarkaði.  Lánastofnanir munu á endanum tapa miklu fé.  Væri ekki ráð að taka á því strax og vinna sig út úr vandanum heldur en að vera í afneitun með þá von um að þetta reddist allt saman, en hvað ætla menn að gera er allt fer á versta veg???

Lánastofnanir þurfa að grípa til aðgerða núna, stjórnvöld munu ekki gera það það held ég að sé nokkuð ljóst.  Lánastofnanir munu ekki græða neitt á allt of háu bókfærðu verði fasteigna í reikningum sínum, það er bara skammtímalaust sem mun bíta þó síðar verði.

 

Enn logn á fasteignamarkaði